Gipuzkoan filmatutako ikus-entzunezko produkzioaren Aipamen Berezia Irusoin eta Moriartiren “Balenciaga”k, Disney+ kanalaren sail originalak, jaso du.

Elena Martínek zuzendutako “Creatura” ikus-entzunezko produkzioak, Vilaüt Films, Lastor Media, Avalon eta Elástica Films-ek ekoiztuak, Barcelona Film Commission, Catalunya Film Commission, Garraf Film Commission eta Maresme Film Commission-en lankidetzarekin, Donostia-Gipuzkoa Film Commission XII. Saria irabazi du.

Donostia-Gipuzkoa Film Commission Sariak beren filmaketekin eszenatoki bihurtzen dituzten hirietan enplegu eta negozio aukerak sorrarazten dituzten ikus-entzunezko ekoiztetxeen lana saritzea du helburu eta Donostia Sustapenak kudeatutako bulegoaren ekimena da. Bulego hori. Donostiako Udaletxeko Ekonomia eta Bertako Enplegurako Zinegotzigoa eta Gipuzkoako Foru Aldundiko Kultura Departamentuaren arteko akordioari esker sortu da.

Maialen Beloki Donostiako Nazioarteko Zinemaldiaren zuzendariordeak, Marta Nieto zinema zuzendariak eta Yon González aktoreak osatutako epaimahaiak entregatu du saria, eta ikus- entzunezkoa filmatu den ingurunearen esentzia antzemateko zehaztasuna eta emakumeen eta sexualitatearen gai sozialei heltzeko zintzotasuna baloratu dituzte epaimahaikideek.

Clara Roquet da "Creatura"ren koidazlea eta pelikula Donostiako Zinemaldiko Ikusmira Berriak egonaldi programaren parte izan da. Milaren historia kontatzen du: bikotekidearekin etxe berrira bizitzera joan ondoren, bere desira sexualaren galeraren zergatia bere baitan dagoela konturatu da. Handik aurrera, bere haurtzaro eta nerabezaroko esperientziak gogoraraziko dizkion bidaiari ekingo dio, bere gorputzarekin bakeak egiteko itxaropenean.

Produkzioak Europako Film Onenaren saria jaso zuen 2023ko Zuzendarien Hamabostaldian, Canneseko Zinemaldian. 7.000 euroko saria Elena Martín zuzendariak jaso du VILAÜT FILMS, LASTOR MEDIA, AVALON eta ELASTICA FILMSko ordezkariekin batera Donostia-Gipuzkoa Film Commission erakundeak Maria Cristina hotelean antolatu duen galan. Ekitaldian, epaimahaikideez eta sarituez gain, Donostiako Udalaren eta Gipuzkoako Foru Aldundiaren ordezkariak egon dira, baita ikus- entzunezko sektoreari lotutako beste erakunde batzuen ordezkariak ere.

Elena Martínek "oso pozik" hartu du saria, "batek lurraldetik idazten duenean eta espazioak pertsonaia bihurtzeko aukera ematen duenean, ingurua nola filmatu funtsezkoa delako: itsasoa, herria eta kaleak, olatuen aurka marruskatzen duten labar harritsuak”. “Niretzat desirak zerikusi handia du itsasbazterreko paisaiaren eta itsasoaren sakonera ukiezinarekin. Eskerrik asko keinu hauek estimatzeagatik eta “Creatura” sari honekin baloratzeagatik ".

Estatuko Film Commission batek egiaztatutako lankidetza izanda, beren produkzio edo koprodukzioen zati bat lurralde nazionalean garatu duten hogeita hamar bat ekoiztetxe nazionalak proposatu dituzte film luzeak edizio honetan.

Hautagai guztietatik bost film aukeratu dira sarirako, guztiak aurtengo edizioan proiektatzen ari dira:

• 20.000 ESPECIES DE ABEJAS, Estibaliz Urresola – 2023 – Espainia – 127 min. – INICIA FILMS SL, ESPECIES DE ABEJAS AIE, GARIZA FILMS. Bizkaia Film Commission eta Vitoria-Gasteiz Film Commission.
• CREATURA, Elena Martin Gimeno – 2023 – Espainia – 112 min. – VILAÜT FILMS, LASTOR MEDIA, AVALON, ELASTICA FILMS. Barcelona FC, Catalunya FC, Garraf FC eta Maresme FC.
• ELS ENCANTATS, Elena Trapé – 2023 – Espainia – 108 min. – COMING SOON FILMS, SL, ENCANTATS FILMS AIE, A CONTRACORRIENTE FILMS, SL. Barcelona Film Commission, Catalunya Film Commission.
• LAS CHICAS ESTÁN BIEN, Itsaso Arana – 2023 – Espainia – 86 min. - LOS ILUSOS FILMS SL. Castilla y León Film Commission. SICA, Carla Subirana – 2023 – Espainia – 87 min. – ALBA SOTORRA SL,
• SICA ALBA SOTORRA AIE, MIRAMEMIRA, AMORAMBRE, ZUZÚ CINEMA Y FILM MARKET FUND. Galicia Film Commission, Catalunya Film Commission.

Eneko Goia Donostiako alkateak zoriondu egin ditu film irabazlea eta aipamen berezia, eta eskertu egin du "Film Commissionek egunero egiten duen lana, hiria urtean zehar hainbat filmaketa egiteko agertoki izan dadin". Ildo horretan, Goiak azpimarratu duenez, "zinema-hiria dugu, baina ez bakarrik aste honetan, Zinemaldia baita protagonista nagusia, baizik eta urtean zehar ere, filmaketak eta ekoizpenak egiten baitira hiriko hainbat lekutan, eta horiek benetako erakusleihoak dira, eta Donostia hiri erakargarria da zuzendari, ekoizle edo aktore askorentzat".

Gainera, Donostiako alkateak nabarmendu duenez, "hirian eta lurraldean dagoen ikus- entzunezko sorkuntza-ehun guztiaren lana da, eta, horri esker, harrotasunez gozatu ahal izango dugu urtez urte Donostiako eta Gipuzkoako zapore argia duten ekoizpenez".

Marisol Garmendia Ekonomia eta Bertako Enplegu zinegotziak adierazi duenez, "Donostia zinema-agertoki bikaina da. Horrela aitortzen dute sirena-kantuei jaramonik egin gabe, paisaia, kultura, azpiegitura eta urte luzeetako profesionaltasuna eskaintzen duen hiri honetan filmatzea erabakitzen dutenek, filmazioak eskatzen duen lana errazteko. Zinemaldiaren esparruan gaude, zer esango dugu! ".

Garmendiak argi utzi du: "zinemaren industriaren aldeko gure apustua irmoa da, tokiko ekonomiari eta enpleguari aberastasuna dakarkiolako; izan ere, gaur aurkezten ditugun filmaketek tokiko produktoreetan eta ikus-entzunezko sorkuntzarekin lotutako enpresetan eragiten dute. Horrela jarraituko dugu”.

Bestalde, Goizane Alvarez Irijoa Kulturako diputatuak adierazi duenez, "Gipuzkoa zine-plato handi bat da, eta zaintzen, kudeatzen eta zabaltzen jakin behar dugu; izan ere, zinemak kanpoko erakarpen eta proiekzioari dagokionez duen balio immaterial ukaezinari aberastasuna eta enplegua sortzeko duen gaitasun ukaezina gehitu behar zaio. Gipuzkoak kostaldea eta barnealdea uztartzen ditu; ondare naturala, kulturala eta industriala; edertasun handiko hiri-espazioak eta, are garrantzitsuagoa dena, edozein proiektu-motaren beharren mailan egoteko gaitasun handiko giza kapitala. Zinemaren industria lurraldearen irudiarentzako erakusleiho gisa ez ezik, aukera ekonomikorako eta talentua erakartzeko leiho gisa ere ikustea da Gipuzkoako Foru Aldundiaren helburua San Sebastian – Gipuzkoa Film Commission tresna sustatzerakoan ".

Aipamen Berezia

SSGFCek, bigarren urtez jarraian, eman dio aipamen berezia Donostian eta Gipuzkoan aurreko urtean filmatu zen ikus-entzunezko proiektu bati. Aurtengo edizioan, aipamen berezia “Balenciaga” sailak jaso du, Gipuzkoako lurraldean ia 3 hilabete iraun duen filmaketagatik, baita tokiko ikus-entzunezko sektoreko profesionalekin lankidetzan aritzeagatik eta parte hartzeko aukeragatik ere.

“Balenciaga” saila Disney katearen jatorrizko produkzioa da, Aitor Arregi, Jon Garaño, Jose Mari Goenaga eta Lourdes Iglesiasek sortutakoa eta Cristobal la serie SL, Irusoin eta Moriarti Produkzioak ekoiztua; sei atal ditu.

Aipamen Berezia, 3.000 eurokoa, José María Goenega eta Xabier Berzosa ekoizleek jaso dute, eta honako hau adierazi dute: "Donostiaren eta Gipuzkoaren aldeko apustua, gure ekoizpenen motor gisa, luzea da eta duela 20 urte baino gehiagokoa da. Tokiko talentuaren kalitatea maila artistiko eta teknikoan islatuta geratu da urte hauetan zehar estreinatutako lanetan. Baina uste dugu, 90 dekoratu baino gehiago dituen "Balenciaga" bezalako proiektuei esker, 100 profesional baino gehiagoko taldea, 4000 figu-rante eta 18 asteko filmaketa, eta Disneyk emandako konfiantzari esker, industria mailan aurrera egitea lortzen ari garela, tokiko ikus-entzunezkoen sektorea garatuz eta indartuz, enpresa hornitzaile berriak sortuz eta, azken batean, nazioartean lehiakorragoak izateko aukera emanez. Prozesu honetan Gipuzkoako Foru Aldundiak eta Donostiako Udalak jasotako babes instituzionala ere eskertu nahi dugu ".